Mat 25 | TPZ | STEP | E Ieesuß to vavaato avoeß e non, pareß soe pan, “Po poen ne eöß e Koaß Teß Pa Napan Kurus se tavus maß, a Matop Vih va pa Vöön va Kin se matan va non manih po vahutët va pa havun köövo sepeß to kon a ma ram pee, pare öhön ee pe voe tövaen manuh hanan.

Matthew 25

A Soe Vapipinoß Va Pa Havun Köövo Sepeß

1 E Ieesuß to vavaato avoeß e non, pareß soe pan, “Po poen ne eöß e Koaß Teß Pa Napan Kurus se tavus maß, a Matop Vih va pa Vöön va Kin se matan va non manih po vahutët va pa havun köövo sepeß to kon a ma ram pee, pare öhön ee pe voe tövaen manuh hanan. 2 Ka manih pee, a havun köövo sepeß poë varih, no a tönim to papön, suk ee to kon a ma ram pee, ivëhkëk, ee to hikta teß vaßpeh me maß ta ma meh ö kompoß ^{▼▼O kompoß no Jiuß to vavapnih ne po ram nee to nok taneß manih po voaß naon vëh o Öliv.} ov in a ma ram. Ka meh tönim to natsean, pare kon a ma ram pee, ko isu a ma puto kompoß, pare teß vaßpeh me ee maß pa ma teß ram pee. 5 Ivëhkëk, e voe tövaen to hikta nönö vëvëhöß non maß, ko köövo sesepeß poë varih mët rakah ee po mamaasoe, pare koroh varo rakah ee.

6 Pa topnin poen rakah no a napan to pënton a pah teß to soe vamanih, ‘E voe tövaen to nö en maß. Sun öm, paröm öhön eah. 7 Ivëh, ka kën mon sesepeß poë varih sun, pare vamatop ee pa ma ram pee. 8 Ivëhkëk, a tönim sepeß papön varih to sun, pare soe ke ra tönim natsean pan, ‘Heß a möm ta ma teß ö kompoß, kemöm vapnih a ma teß ram pemöm. A ma teß ram pemöm to muteß ee, suk o kompoß to kit en.’ 9 Ivëhkëk, a tönim köövo sepeß natsean varih to piun rapoë, pare soe pan, ‘Ahik, o kompoß vaßih to hikta antoen a rora kurus. Eß to vih non peöm se nö, paröm voen maß ta ma teß ö kompoß koman peöm.’ 10 A tönim köövo sepeß varih to posean vure pa nö pa vavoen kompoß. Ke voe tövaen nö en maß. Ka tönim köövo sepeß natsean varih to teß vamatop ne sih, nö vaßpeh me ee peß manuh pa taëën va po vaen. Kee ho ee koman iuun, ko panih ee maß po hopaß.

11 Vasuksuk no a meh tönim köövo to hah maß, pare ep o hopaß to papanih en, pare tekteok ne o hopaß, pare sosoe ne pan, ‘Sunön, Sunön, peret ka nös möm ah.’ 12 Ivëhkëk, e voe tövaen to soe maß pan, ‘Eöß to soe vaman rakah keoß peöm, Eöß to hikta nat noß peöm.’”

13 Ivëh, ke Ieesuß soe ke poß rapoë pan, “Eöm se teß vamatop nem, suk ataeah, eöm to hikta nat nem po poen, me a aoaß poanheh ne eöß e Koaß Teß pa Napan Kurus se hah maß.”

A Soe Vapipinoß Va Pa Nap Kiu To Kon A Moniß Pe Torara Pee

Luk 19:11-27

14 E Ieesuß to vavaato avoeß e non, pareß soe pan, “A Matop Vih va pa Vöön va Kin to teß va e non manih pe torara to kehkeh nö non pa meh muhin, pareß vaoe na a ma teß kikiu peß, kee nö maß keß heß vakëkëh raoe a ma tah peß te matop ne. 15 Eß to heß suk na o nat pa ma paeh teß kikiu peß. Eß to heß en pa pah teß kikiu peß pa K5,000.00, ka vapöök neß to heß a K2,000.00, ka vakön pa K1,000.00. Eß to heß vahik rapoë a moniß peß, pareß nö poß en pa meh muhin pa vavih. 16 Ka teß vëh to kon voh a K5,000.00, to vakiu vëvëhöß rakah en pa K5,000.00 pamëh, pareß kon en pa meh K5,000.00 to tok maß. 17 Ka teß vëh to kon voh a K2,000.00, to vakiu a K2,000.00 pamëh, pareß kon a meh K2,000.00 to tok maß. 18 Ivëhkëk, a teß vëh to kon a K1,000.00, to teß a moniß pamëh, pareß en a koveß manih po oeh ko pe en pa moniß.

19 E torara pee to teß varë vahik en, pareß hah en maß, pareß hi en pa ma teß kikiu peß pa ö nee to nok vah va in a moniß peß. 20 Ka teß kikiu vëh to kon voh a K5,000.00, to nö me en maß pa meh K5,000.00. Pareß soe ke torara peß pan, ‘Torara peöß, eën to vaman voh e nom peöß se matop vavih noß a K5,000.00 pën. Eöß to vakiu voh a moniß pën, paröß kon eoß pa meh K5,000.00 to tok maß.’ 21 Ke torara peß soe ke poan pan, ‘Eën a teß kikiu vih rakah. Eën to nok voh a kiu vih rakah, parën matop voh nom a siß tah soneß. Ivëh, köß vaman e noß pën se matop e nom pa ma tah peo peöß. Nö mah, ko vaeö me a neoß.’

22 Ka teß kikiu vëh to kon a K2,000.00 nö me en maß pa meh K2,000.00. Pareß soe ke torara peß pan, ‘Torara peöß, eën to vaman voh e nom peöß se matop vavih noß a K2,000.00 pën. Eöß to vakiu voh a moniß pën, paröß kon eoß pa meh K2,000.00 to tok maß.’ 23 Ke torara peß soe ke poan pan, ‘Eën a teß kikiu vih rakah. Eën to nok voh a kiu vih rakah, parën matop voh nom a siß tah soneß. Ivëh, köß vaman e noß pën se matop e nom pa ma tah peo peöß. Nö mah, ko vaeö me a neoß.’

24 Ka teß vëh to kon voh a K1,000.00 nö maß, pareß soe ke torara peß pan, ‘Torara peöß, eöß to nat e noß pën no a taateß pën to parin a hivaß. A ma taëën nën to ënëën nom sih, ee a ma taëën nën to hikta nep voh. Parën osoes nom a voaß nën to hikta poßpoß voh. 25 Ivëh, nöß to nanaöp suk voh noß, paröß nö ko koaan eoß pa K1,000.00 pën manuh po oeh. Keß ivaßih a moniß pën.’

26 Ke torara peß soe ke poan pan, ‘Eën a teß hat rakah, parën karauh. Eën to soe ka neoß pan, eën to nat e nom peöß to enen noß sih a ma tah nöß to hikta nep voh. Me eöß to osoes noß a voaß nöß to hikta poßpoß voh. 27 Ivëh, kën hikta vahoß suk poß voh a moniß peöß ataeah pa benk, köß se hah maß, ko kon a moniß peöß me a teß to teß oah non.’ 28 Ke torara soe ke a meh teß kikiu pan, ‘Öt këh a teß vëh a K1,000.00, parën heß a teß vëh to teß me non a K10,000.00. 29 O teß varih to vaneah ne a ma siß tah keok, eöß se heß oah eoß pee pa ö nee to öt va ne. Ivëhkëk, o teß varih to hikta vaneah ne a ma tah peo, eöß se kon këh eoß pee pa ma siß tah nee to vaneah ne.’ 30 Ke torara soe pan, ‘Vi na öm a teß kikiu karauh vëh manuh pa vöön popoen. Manuh pa vöön pamëh no a napan se vaokook kov e ne, pare vakuskus rivon kov e ne po kamis.’

E Koaß Teß Pa Napan Kurus Se Kiiki A Napan Kurus

31 E Ieesuß to vavaato avoeß e non, pareß soe pan, “Eöß e Koaß Teß Pa Napan Kurus se hah me maß o kikis peöß manih po oeh vamanih pa teß Sunön me ro ankeroß peöß. Eöß se tavus a teß Sunön, paröß ihoß pa ö ihihoß pa teß sunön marën a kiiki a ma taateß pa napan. 32 Ka napan va po oeh kurus tönun maß manih peöß. Köß ki vakëh eoß pee po pöök kum. Keß matan va non manih pa teß mamatop sipsip to ki vakëh o sipsip me ro meemeß. 33 Eöß se vahoß o teß varih to nonok ne sih a ma taateß totoopin manih pa papmatö peöß. Ko teß varih to hikta vavatet voh ne a soe peöß pen Tamaneoß Sosoenën se nö ee manuh pa papkiruk peöß. 34 Ke eöß a teß Sunön se soe va eoß po teß varih to teß ne manih pa papmatö peöß to nonok ne sih a ma taateß totoopin pan, ‘Nö maß öm, eöm varih ne Tamön to tapui voh en peöm. Nö maß öm, paröm teß nem manih pa Matop Vih ne Sosoenën to vamatop anoeh voh a neöm, taneo non maß po poen ne Sosoenën to soe ko oeh tavus.’ 35 Suk ataeah, eöß to maë, köm makën em peöß, ko manoe, köm heß em peöß pa ruen, köß kaak eoß. Paröß teß varo këh noß a vöön peöß, köm me em peöß pa ma iuun peöm. 36 Ko poen nöß to arus rara, köm rara em peöß, köß haraß a hiinana, köm matop e nem peöß, köß teß noß pa nohnoh, köm nönö e nem na pa ep a neoß.’

37 Ko teß varih to nonok ne sih a ma taateß totoopin se soe ee pan, ‘Sunön, o poen poanheh nemöm to ep ka oah to maë, pamöm makën a oah? Me o poen poanheh nemöm to ep ka oah to manoe, pamöm heß oah a ruen kën kaak? 38 O poen poanheh nemöm to ep ka oah to teß varo këh nom a vöön pën, pamöm vaoe a oah pa ma iuun pemöm? Me o poen poanheh nemöm to ep ka oah to hikta teß me nom to rara, pamöm heß oah o rara kën rara? 39 O poen poanheh nemöm to ep ka oah to haraß nom a hiinana, me eën to teß nom pa nohnoh, kemöm matop ka nom oah?’ 40 Ke eöß a teß Sunön se piun rapoë, paröß soe ke rapoë pan, ‘Eöß to soe vaman rakah keoß peöm, a ma moeh tah nöm to nok voh manih pa ma kea peöß varih, eöm to nok me em manih peöß.’

41 “Ke eöß a teß Sunön se soe vahik vakomanih, paröß soe ke poß o teß varih to teß ne manih pa papkiruk peöß to hikta nonok ne sih a ma taateß totoopin pan, ‘Këh a na neoß öm. E Sosoenën to soe voh en peöm varih se kon kamis. Eöm se nö manuh po suraß vëh to hikta onöt non a muteß. A suraß pamëh to vamatop anoeh e non pe susun po oraß hat, me ro ankeroß peß. 42 Suk ataeah, eöß to haraß voh noß o maë, köm hikta makën a neoß. Ko manoe, köm hikta heß a neoß ta ruen, köß kaak. 43 Paröß teß varo këh noß a vöön peöß, köm hikta vaoe a neoß pa ma iuun peöm, ko hikta teß me noß to rara, köm hikta heß a neoß to rara. Paröß haraß noß a hiinana, me eöß to teß noß pa nohnoh, köm hikta nö maß pa ep a neoß.’

44 “Ka napan poë varih to antoen e ne pa piun a neoß pan, ‘Sunön, o poen poanheh nemöm to ep voh ka nom oah to teß maë nom, parën teß manoe nom? Me o poen poanheh nemöm to ep voh ka nom oah to teß varo këh nom a vöön pën? Me o poen poanheh nemöm to ep ka oah to hikta teß me nom to rara, me eën to teß nom pa nohnoh? Emöm ep voh nem a ma tah varih nih, pamöm hikta vaßaus a oah?’ 45 Ke eöß a teß Sunön se piun va in a soe pee manih pan, ‘Eöß to soe vaman rakah keoß peöm, a ma moeh tah kurus nöm to hikta nok voh manih pa ma teß peöß varih, eöm to hikta nok voh manih peöß.’

46 “O teß varih to vatösoe voh ne, eöß e Sunön se veo eoß pee, kee nö ee pa vöön va po kamis teßteß tamoaan. Ko teß varih to nonok ne sih a ma taateß totoopin, ne eöß e Sunön se me eoß pee manuh pa vöön va kin kee kon ee po toßtoß tamoaan.”